K+12, Makatuwiran Ba?

Naging malaking issue sa bansa ng mga nakaraang taon ang pagpapatupad ng ating gobyerno sa programang K+12 sa larangan ng edukasyon sa ating bansa, nagkaroon ng maraming pagtatalo at pagmamartsa sa kalsada para labanan ito kaya’t ipinatigil muna ang pagpaptupad nito.  At ngayon hindi na daw  mapipigil pa ang ating gobyerno sa pagpapatupad nito ngayong darating na pasukan.

Sa inyong palagay, makatuwiran ba sa bawat Pilipino ang pagpapatupad nito?

Ang K+12 para sa ating kaalaman ay bagong programang gustong ipatupad ng pamahalaan sa edukasyon ng bansa para maging competitive pagdating sa pakikipagtagisan sa ibang lahi, ang K ay para sa kindergarten, required na makapag-aral ang isang bata para makatuntong ng elementary, ang +12 ay hinati sa tatlong antas na aabot ng labing dalawang taon, ito ang anim na taon sa elementary, apat na taon sa junior high school at dalawang taon sa senior high school.

 

Ang aking pananaw sa programang ito ay ibabase ko sa sariling pag-aaral, kung ang isang mag-aaral ay magsisimula ng anim na taon para makapasok ng kinder at gugugol ng labingdalawang taon sa elementary at high school, at halimabawa gugugol pa ulit ng apat na taon sa kolehiyo, aabot ng 22 years old na siya bago makapagtapos ng pag-aaral. Naisip kaya ng ating gobyerno na kayang pag-aralin ng bawat magulang ang kanilang mga anak ng ganoon katagal na pag-aaral ng isang bata?

Oo makatuwiran ito sa mga taong may kaya, pero sa mga naghihirap ba makatuwiran din? Kung ngayon nga na hindi pa naipapatupad ang programang ito ay halos hindi na makatuntong ng ibang kababayan natin sa high school dahil sa kakapusan ng pangsuportang pinansyal sa pag-aaral ng mga magulang, ano pa kaya kung maipatupad na ang K+12? Ilan na lang kaya ang kayang makapagtapos sa pag-aaral?

Ang Pilipinas sa kasalukuyan ay may populasyon na mahigit 100 milyong Pilipino, ayon sa ibinigay na datos ng gobyerno, mahigit 13.2 milyon ang nakapag-enroll sa mga pampublikong paaralan sa buong bansa ng sy 2013-2014, at ayon sa surbey ng isang pribadong kompanya, aabot daw mahigit 12.1 milyong Pilipino ang naghihirap ng taong 2014.

Hindi kaya ng utak ko na kalkulahin kung may tama o mali sa proporsyon ng mga bilang ng mag-aaral at bilang ng populasyon sa Pilipinas, pero ang surbey na pinagkakatiwalaan at pinagbabasehan ng karamihan  sa tingin ko ay may mali, dito din ba ibinase ng gobyerno kaya gusto nilang ipatupad ang K+12? Sino sino ba ang mga taong tinanong para sa surbey na ito? Nalalaman ba ng mga taong ito at ng ating gobyerno kung gaano karami ang mga mahihirap sa Pilipinas? Hindi na siguro kailangan pang isa isahin.

Para sa akin hindi pa napapanahon ang pagpapatupad ng K+12, bagkus bigyan ng kosentrasyon ang kasalukuyang programa, gumabay sa pag-aaral sa buong bansa may kakayahan man o mahina sa edukasyon, magbigay ng siguardong trabaho sa mga gustong makapag-aral na kulang sa pinansyal at sa mga makakapagtapos. At sana maging sincere ang mga taong pingkakatiwalaan dito, huwag po na pinipili lang ang mabibigyan ng suporta. Madaming Pilipino ang umaasa sa inyo.